ماوەی سێ بۆ چوار ڕۆژە شەپۆلێکی نوێی ناڕەزایەتی و مانگرتن شارە جیاوازەکانی ئێران و ڕۆژهەڵاتی کوردستانی گرتووەتەوە. بەپێی سەرچاوە هەواڵییەکان، ئەمڕۆ سێشەممە کاسبکارانی تاران، کرماشان، شیراز، ئەهواز و کەرەج وەک ناڕەزایەتییەک بەرامبەر بە بەرزبوونەوەی بەردەوامی بەهای دۆلار و سستبوونی بازاڕ، دوکانەکانیان داخستووە و ڕژاونەتە سەر شەقامەکان. لە تاران دۆخەکە گرژیی توندی بەخۆیەوە بینیوە و لە شەقامی “مییەت” هێزە ئەمنییەکان بۆ بڵاوەپێکردنی خۆپێشاندەران ڕاستەوخۆ تەقەیان لە خەڵک کردووە. خوێندکارانی زانکۆکانیش پەیوەندییان بە شەپۆلی ناڕەزایەتییەکانەوە کردووە.
ڕەشبگیری و بەکارهێنانی گازی فرمێسکڕێژ
هاوکات لەگەڵ خۆپیشاندانەکان، هێزە ئەمنییەکانی کۆماری ئیسلامی هەڵمەتێکی چڕی دەستگیرکردنیان دەستپێکردووە. ڕێکخراوەکانی مافی مرۆڤ (تۆڕی مافی مرۆڤی کوردستان و هانا) ئاشکرایان کردووە کە لە چەند ڕۆژی ڕابردوودا ١٨ هاووڵاتیی کورد و ئێرانی بەبێ فەرمانی دادوەر لەلایەن ئیتڵاعاتەوە دەستبەسەر کراون و چارەنووسیان نادیارە. لە شاری کرماشان، هێزە ئەمنییەکان لە شەقامەکانی مودەڕیس و نەوبەهار بە گازی فرمێسکڕێژ هێرشیان کردووەتە سەر خۆپیشاندەران و لانیکەم ١٠ هاووڵاتییان دەستبەسەر کردووە کە لەنێوانیاندا منداڵ هەیە.
قەیرانی خزمەتگوزاری لە سنە
لەدەرەوەی دۆخە سیاسییەکە، دۆخی خزمەتگوزاریش لە پارێزگای سنە بەهۆی شەپۆلی بەفر و سەرماوە تێکچووە. محەممەدسەعید سوڵتانی، بەڕێوەبەری کارەبای پارێزگای سنە ڕایگەیاندووە کە بەهۆی بارینی بەفرەوە زیاتر لە ٣٠٠ ستوونی کارەبا کەوتوون و کارەبای ٣٢٦ گوند بڕاوە. هەرچەندە تیمەکان توانیویانە کارەبای ٧٩ گوند چاک بکەنەوە، بەڵام هێشتا ٢٤٧ گوند بێ کارەبان، کە زۆربەیان دەکەونە سنووری شارەکانی سەقز و بانە و بەهۆی داخرانی ڕێگاکانەوە تیمەکان نەیانتوانیوە بگەنە شوێنی مەبەست.