ناوەندی فەلەکناسیی نێودەوڵەتی و شارەزایانی کەشناسی ئاشکرایان کرد کە بەپێی هەژمارە فەلەکییەکان، ڕۆژی پێنجشەممە 19ی شوباتی 2026 دەبێتە یەکەم ڕۆژی مانگی ڕەمەزانی پیرۆز. ئەم دیاریکردنە دوای ئەوە دێت کە دەرکەوتووە بینینی مانگ لە ئێوارەی سێشەممە 17ی شوباتدا لە زۆربەی وڵاتانی ئیسلامی «مەحاڵ» دەبێت.

هۆکاری دیاریکردنی ئەم ڕۆژە

بەگوێرەی ڕاگەیەندراوی ناوەندەکە، لە ئێوارەی 17ی شوباتدا مانگ پێش خۆرئاوابوون یان هاوکات لەگەڵ خۆرئاوابووندا ئاوا دەبێت، ئەمەش وادەکات بینینی هیلال بە هیچ شێوەیەک، چ بە چاوی ئاسایی و چ بە تەلیسکۆپ، نەکرێت.

بۆ نموونە، لە جاکارتا مانگ 6 خولەک پێش خۆر ئاوا دەبێت، لە ئەبووزەبی یەک خولەک پێش خۆر و لە ڕیاز 42 چرکە پێش خۆر ئاوا دەبێت. لە قاهیرەش تەنیا 2 خولەک دوای خۆر دەمێنێتەوە کە بەهۆی نزیکییەوە لە خۆر نابینرێت.

دیاردەی خۆرگیران و هۆشدارییەک

هەر لەو ڕۆژەدا (17ی شوبات)، خۆرگیرانێکی بازنەیی لە باشووری ئەفریقا و جەمسەری باشوور ڕوودەدات، ئەمەش بەڵگەیەکی زانستییە کە مانگ لەو کاتەدا لەنێوان زەوی و خۆردایە (قۆناغی مانگی نوێ) و ناکرێت لە ئاسماندا ببینرێت. ناوەندەکە هۆشداریش دەدات کە ڕەنگە هەندێک کەس هەسارەی ڤینۆس (زەهرە) بەهەڵە وەک مانگ ببینن، چونکە لەو ئێوارەیەدا لە نزیک شوێنی مانگ دەبێت.

بۆچوونی شارەزایانی کورد و مەرجەعەکان

سیروان ساڵح، شارەزای بواری فەلەکی و کەشناسی پشتڕاستی دەکاتەوە کە ئێوارەی 29ی شەعبان مانگ و خۆر پێکەوە ئاوا دەبن، بۆیە مانگی شەعبان ئەمساڵ 30 ڕۆژ دەبێت و ڕۆژی چوارشەممە 18ی شوبات دەبێتە تەواوکەری مانگەکە.

هاوکات نووسینگەی ئایەتوڵڵا عەلی سیستانی پێشبینی دەکات ڕۆژی پێنجشەممە 19ی شوبات یەکەم ڕۆژی ڕەمەزان بێت. ئەمەش ئەگەرێکی بەهێز دروست دەکات کە بۆ یەکەمجار لە ماوەی ڕابردوودا، سوننە و شیعە لە عێراقدا بەیەکەوە دەست بە ڕۆژووگرتن بکەن.