پێشنیوەڕۆی ئەمڕۆ یەکشەممە ١ی شوباتی ٢٠٢٦، لە قەزای شارەزوور رووداوێکی دڵتەزێن روویدا کە تێیدا ژنە کرێکارێکی دووگیان لە کاتی کارکردندا لە کارگەیەکی ئاو لە بەرزاییەوە کەوتەخوارەوە و بەهۆیەوە گیانی لەدەستدا.
بەپێی زانیارییەکان، قوربانییەکە ناوی «کیژێ رزگار»ـە و تەمەنی ٣٠ ساڵە، دایکی منداڵێکە و لە کاتی رووداوەکەشدا دووگیان بووە. دوای کەوتنەخوارەوەی لە شوێنێکی بەرزی کارگەکەوە، بە سەختی بریندار بووە و گەیەندراوەتە نەخۆشخانەی شەهید رەئوف بەگ لە شارەزوور.
سامان سابر، بەرپرسی هۆبەی فریاکەوتنی نەخۆشخانەی گشتیی شەهید ڕەئوف بەگ رایگەیاندووە، هەرچەندە تیمە پزیشکییەکان هەوڵی رزگارکردنیان داوە، بەڵام بەهۆی ئەوەی زەبرێکی توند بەر قەفەزەی سینگی کەوتبوو و تووشی خوێنبەربوونی ناوەکی ببوو، دوای چەند خولەکێک لە گەیشتنی بە نەخۆشخانە گیانی لەدەستداوە. دواتر تەرمەکەی رەوانەی پزیشکی دادی سلێمانی کراوە.
کاردانەوەی سەندیکای کرێکاران
عوسمان زیندانی، سەرۆکی سەندیکای کرێکارانی بیناسازی لەبارەی رووداوەکەوە رایگەیاند، بەدواداچوونی ورد بۆ هۆکاری کەوتنەخوارەوەی ئەو ژنە دەکەن. ناوبراو وتی: «بە راوێژ لەگەڵ خێزانی کۆچکردوو، خاوەن کارگەکە دەدەینە دادگا بۆ لێکۆڵینەوە لە پارێزراوی و مەرجەکانی سەلامەتی لە شوێنی کارەکەدا».
سەندیکای کرێکاران ئاماژەی بەوەشکردووە کە بەپێی یاسا دەبێت کرێکاری ژن ٧٢ رۆژ پێش منداڵبوون مۆڵەتی پێبدرێت و لە کاردا نەبێت، بۆیە لێکۆڵینەوە لە دۆخی کارکردنی ئەو ژنە دەکرێت.
ئامارەکان نیگەران کەرن
ئەمە سێیەم حاڵەتی گیانلەدەستدانی کرێکارانە لە ماوەی مانگی رابردوو و سەرەتای ئەم مانگەدا لە سنووری پارێزگای سلێمانی. عوسمان زیندانی ئاشکرای کرد کە لەمساڵدا سێ کرێکار لە کاتی کارکردندا گیانیان لەدەستداوە، کە جگە لەم ژنە، دوو کرێکارەکەی دیکە بیانی بوون (هیندییەک و هاوڵاتییەکی خەڵکی ڕۆژهەڵاتی کوردستان).
سەندیکای کرێکاران جەختی کردەوە کە دۆسیەی لێکۆڵینەوە بۆ رووداوەکە کراوەتەوە و بەدواداچوون دەکەن بۆ ئەوەی مافی کرێکارەکە و قەرەبووکردنەوەی مسۆگەر بکرێت، هاوکات فشار دەخەنە سەر خاوەن کارەکان بۆ پابەندبوون بە مەرجەکانی سەلامەتی.