د. بەرهەم ساڵح، سەرۆک کۆماری پێشووی عێراق، ئەمڕۆ پێنجشەممە ١ی کانوونی دووەمی ٢٠٢٦، بە فەرمی وەک ١٢ـەمین کۆمیسیاری باڵای نەتەوە یەکگرتووەکان بۆ کاروباری پەنابەران (UNHCR) دەستبەکار بوو. ئەمەش دوای ئەوەی لە کۆتایی ساڵی ڕابردوودا لەلایەن ئەنجومەنی گشتیی نەتەوە یەکگرتووەکانەوە بە زۆرینەی دەنگ بۆ ئەو پۆستە هەڵبژێردرا.
ئاڵوگۆڕی دەسەڵات و پەیامی گراندی
فیلیپۆ گراندی، کۆمیسیاری پێشوو، ئەمڕۆ ماڵئاوایی لە پۆستەکەی کرد و لە هەژماری تایبەتی خۆی لە تۆڕی کۆمەڵایەتیی «X» وێنەیەکی هاوبەشی خۆی و د. بەرهەم ساڵحی بڵاو کردەوە. گراندی وێڕای پیرۆزبایی، لە پەیامەکەیدا بۆ د. بەرهەم نووسیویەتی: «هێز و هیوای باشترین بۆ ئێوە، کاتێک وەک ١٢ـەمین کۆمیسیاری باڵای نەتەوە یەکگرتووەکان بۆ کاروباری پەنابەران دەستبەکار دەبیت».
یەکەم لێدوانی دوای دەستبەکاربوون
هاوکات د. بەرهەم ساڵح لە یەکەم لێدوانیدا دوای دەستبەکاربوونی، لە پەیامێکدا لە تۆڕی کۆمەڵایەتیی ئێکس ڕایگەیاند: «ئەمڕۆ وەک کۆمیسیاری باڵای نەتەوە یەکگرتووەکان بۆ کاروباری پەنابەران دەستبەکار بووم». ناوبراو ئاماژەی بە پلانی خۆی دا بۆ قۆناغی داهاتوو و جەختی لەوە کردەوە: «لەگەڵ هاوبەشەکان و گەلانی میواندار کار دەکەین بۆ پاراستنی پەنابەران و گەیاندنی چارەسەری بەردەوام و ڕووبەڕووبوونەوەی قەیرانەکانی ئاوارەبوون کە کاریگەرییان لەسەر ملیۆنان کەس لە جیهاندا هەیە».
پاشخانی هەڵبژاردنەکە
جێی وەبیرهێنانەوەیە، شەوی ١٨ی کانوونی یەکەمی ٢٠٢٥، ئەنجومەنی گشتیی نەتەوە یەکگرتووەکان لە دانیشتنی ئاسایی خۆیدا بە کۆی دەنگ د. بەرهەم ساڵحی وەک کۆمیسیاری نوێی پەنابەران پەسەند کرد بۆ ئەوەی جێگەی فیلیپۆ گراندی بگرێتەوە، کە ماوەی خزمەتەکەی کۆتایی هاتبوو.