بازنەی ناکۆکییە ناوخۆییەکانی ماڵی کورد لە بەغداد فراوانتر دەبێت، بەتایبەت دوای ئەوەی پەرلەمانی عێراق دەستەی سەرۆکایەتیی هەڵبژارد و ئێستا ململانێکان لەسەر پۆستی سەرۆک کۆماری عێراق چڕ بوونەتەوە. بڕیارە سەرەتای هەفتەی داهاتوو پارتی دیموکراتی کوردستان هەڵوێستی کۆتایی خۆی لەوبارەیەوە ڕابگەیەنێت.

کۆبوونەوەی چارەنووسساز لە پیرمام

بەگوێرەی زانیارییەکان، بڕیارە پێشنیوەڕۆی ڕۆژی شەممە ٣ی کانوونی دووەمی ٢٠٢٦، مەکتەبی سیاسیی پارتی دیموکراتی کوردستان بە سەرپەرشتیی مەسعود بارزانی و ئامادەبوونی جێگرانی سەرۆک لە پیرمام کۆببێتەوە. سەرچاوەیەکی باڵا لە پارتی ڕایگەیاندووە کە تەوەری سەرەکیی کۆبوونەوەکە بریتی دەبێت لە پرسی پۆستی سەرۆک کۆماری عێراق و یەکلاکردنەوەی ئەوەی ئایا پارتی کاندیدی دەبێت یان نا، لەگەڵ تاوتوێکردنی پێکهێنانی حکومەتی نوێی هەرێم و بەغدا.

پێشنیارەکەی بارزانی و کاردانەوەی یەکێتی

ڕۆژنامەی «شەرق ئەلئەوسەت» ئاشکرای کردووە، مەسعود بارزانی پێشنیاری کردووە میکانیزمی دیاریکردنی کاندیدی سەرۆک کۆمار گۆڕانکاری بەسەردا بێت، بە شێوەیەک پەرلەمانی کوردستان نوێنەرێک بۆ ئەو پۆستە دیاری بکات. ئەم پێشنیارە لەلایەن یەکێتییەوە بە هەوڵێک بۆ شکاندنی ڕێککەوتنی سیاسیی نەنوسراوی نێوانیان لێکدەدرێتەوە، کە بەپێی نەریت پۆستی سەرۆک کۆمار بۆ یەکێتی و سەرۆکی هەرێم بۆ پارتی بووە. هاوکات، میدیاکان ئاشکرایان کردووە کە یەکێتی سێ کەسی بۆ ئەو پۆستە ئامادە کردووە کە بریتین لە: نزار ئامێدی، لەتیف ڕەشید (سەرۆک کۆماری ئێستا) و ئاسۆ فەرەیدوون.

ململانێی پەرلەمان و دوورخستنەوەی شاخەوان عەبدوڵا

لەسەر ئاستی پەرلەمان، گۆڕانکارییەکان بە ئاڕاستەیەکی دیکەدا ڕۆیشتوون. محەمەد کەربولی، پەرلەمانتاری هاوپەیمانیی عەزم ئاشکرای کرد کە حزبی تەقەدوم بە سەرۆکایەتیی حەلبوسی ڕێگرییان کردووە لەوەی شاخەوان عەبدوڵا پۆستی جێگری دووەمی سەرۆکی پەرلەمان وەربگرێتەوە، بە پاساوی ئەوەی «حەلبوسی دەرچوو، دەبێت جێگرەکەشی دەرچێت».

لەم چوارچێوەیەدا، فەرهاد ئەترووشی وەک جێگری دووەمی سەرۆکی پەرلەمان هەڵبژێردرا. بەنگین ڕێکانی، وەزیری ئاوەدانکردنەوەی عێراق ئاشکرای کردووە کە بافڵ تاڵەبانی، سەرۆکی یەکێتی پەیوەندی پێوە کردووە و پێی ڕاگەیاندووە کە «دەنگ بە کاندیدەکەی پارتی (فەرهاد ئەترووشی) دەدەین»، ئەمەش وەک ئاماژەیەک بۆ جۆرێک لە هەماهەنگیی کاتی سەرەڕای ناکۆکییە ستراتیژییەکان.

مەترسی لەسەر پێگەی کورد

چاودێران و توێژەرانی سیاسی هۆشداری دەدەن کە ناتەبایی هێزە کوردییەکان پێگەی سیاسی و دەستووریی هەرێمی کوردستانی لە بەغداد لاواز کردووە. لە کاتێکدا لایەنە شیعی و سوننییەکان لە پرسە ستراتیژییەکاندا هەماهەنگییان هەیە، کورد بە پەرتەوازەیی دەچێتە بەغداد. زیرەک تەیار، پەرلەمانتاری پارتی ڕایگەیاندووە کە لایەنە عێراقییەکانیش پێیان باشە کورد بە یەک کاندید بۆ سەرۆک کۆمار بەشداری بکات، بەڵام تا ئێستا ئاسۆی ڕێککەوتن لێڵە.