لیندسی گراهام، سیناتۆری دیاری کۆمارییەکان لە ئەنجوومەنی پیرانی ئەمریکا، ڕایگەیاند کە لەم هەفتەیەدا پڕۆژەیاسایەک بە ناوی «یاسای پاراستنی کورد» (Save the Kurds Act) پێشکەش بە کۆنگرێس دەکات. ئامانجی سەرەکی ئەم پڕۆژەیە سەپاندنی سزای توندە بەسەر هەر حکوومەت یان گرووپێکدا کە هێرش بکاتە سەر کورد یان ببێتە هەڕەشە بۆ سەریان، بەتایبەت لە سایەی نیگەرانییەکان لە هاوپەیمانیی نێوان حکوومەتی نوێی سووریا و تورکیا.

هۆشداری لە دۆخی سووریا و وردەکاریی پڕۆژەکە

گراهام لە پۆستێکدا لە تۆڕی کۆمەڵایەتی ئێکس هۆشداری داوە کە «کورد هاوپەیمانی متمانەپێکراوی ئەمریکایە و نامانەوێت خوێنڕشتن لە باکووری ڕۆژهەڵاتی سووریا ڕووبدات». ئەم هەڵوێستە دوای ئەوە دێت کە لە ٦ی کانوونی دووەمی ٢٠٢٦ـەوە هێرشی فراوانی گرووپە چەکدارەکانی سەر بە دیمەشق بۆ سەر ناوچەکانی حەلەب، قامیشلۆ و حەسەکە دەستیپێکردووە. گراهام پێیوایە دەستبەرداربوون لە کورد دەبێتە «کارەسات» بۆ ئاسایشی نیشتمانیی ئەمریکا. هاوکات کوردانی ئەمریکا کەمپینێکی بەرفراوانیان بۆ پشتیوانی لەم پڕۆژەیاسایە دەستپێکردووە و فشار دەخەنە سەر کۆنگرێس بۆ پەسەندکردنی.

پشتیوانیی بەرفراوانی سیناتۆرەکان

هاوتەریب لەگەڵ هەوڵەکانی گراهام، سیناتۆرە دیموکرات و کۆمارییەکان یەکهەڵوێستن. سیناتۆر کریس کوونز لە لێدوانێکدا بۆ میدیاکان ڕایگەیاند: «نابێت بکشێینەوە و ڕێگە بە پێشڕەویی هێزە چەکدارەکانی سووریا بدەین. لە جیاتی ئەوە، پێویستە پشتیوانیی هێزەکانی سووریای دیموکرات (هەسەدە) بکەین». کوونز هەروەها جەختی لە گرنگیی بەردەوامیی پەیوەندی و پشتیوانیکردنی سەرۆک بارزانی کردەوە و بە «هاوبەشێکی جێی متمانە و دڵسۆز» وەسفی کرد. لای خۆیەوە ڕیک سکۆت هۆشداری دا لە کەوتنە ژێر کاریگەریی ئێران لە عێراق و داوای کرد ئەمریکا هەموو هەوڵێک بدات بۆ ڕێگریکردن لە شەڕ.

بەیاننامەی چوارقۆڵی و واقیعی مەیدانی

لەسەر ئاستی نێودەوڵەتی، هەریەکە لە ئەمریکا، بەریتانیا، فەرەنسا و ئەڵمانیا لە بەیاننامەیەکی هاوبەشدا پێشوازییان لە درێژکردنەوەی ئاگربەست بۆ ماوەی ١٥ ڕۆژ (کە لە ٢٤ی ئەم مانگەوە دەستیپێکردووە) لە نێوان هێزەکانی حکوومەتی سووریا و هەسەدە کرد و داوای چارەسەری سیاسییان کرد.

لە بەرانبەردا، بەڕێوەبەرایەتیی خۆسەر لە باکووری ڕۆژهەڵاتی سووریا ڕەخنەی توندی لە ناوەڕۆکی بەیاننامەکە گرت و ڕایگەیاند کە ئەوەی لەسەر زەوی ڕوودەدات پێچەوانەی بەیاننامەکانە. بەڕێوەبەرایەتییەکە جەختی کردەوە کە هێرشەکان و گەمارۆی خنکێنەری سەر کۆبانێ بەردەوامە و حکوومەتی دیمەشق پابەندی ئاگربەست نەبووە، بۆیە داوای لە کۆمەڵگەی نێودەوڵەتی کرد «لە زمانی بەیاننامەوە بچنە هەنگاوی پڕاکتیکییەوە» بۆ ڕاگرتنی پێشێلكارییەکان.