پەیوەندییەکانی نێوان ویلایەتە یەکگرتووەکانی ئەمریکا و کۆماری ئیسلامی ئێران پێ دەنێتە قۆناغێکی نوێی مەترسیدارەوە، دوای ئەوەی دۆناڵد ترەمپ، سەرۆکی ئەمریکا فەرمانی جووڵاندنی هێزێکی دەریایی زەبەلاحی بەرەو ئاوەکانی ناوچەکە دەرکرد و تارانیش ئامادەیی خۆی بۆ هەر ئەگەرێک ڕاگەیاند.
ڕۆژی چوارشەممە ٢٨ی کانوونی دووەمی ٢٠٢٦، دۆناڵد ترەمپ لە پەیامێکدا لە تۆڕی کۆمەڵایەتیی «تروس سۆشیال» ڕایگەیاند کە هێزێکی دەریایی گەورە بە سەرۆکایەتیی کەشتیی فڕۆکەهەڵگری «ئەبراهام لینکۆڵن» بە خێرایی و ورەیەکی بەرزەوە بەرەو ئێران دەڕوات. ترەمپ ئاماژەی بەوە کردووە کە ئەم هێزە زۆر گەورەترە لەو هێزەی پێشتر بۆ ڤەنزوێلا نێردرابوو.
هەڕەشەکانی ترەمپ و سیناریۆی «چەکوشی نیوەشەو»
سەرۆکی ئەمریکا بە ڕاشکاوی هۆشداری داوەتە تاران کە دەبێت بە خێرایی بێنە سەر مێزی گفتوگۆ بۆ گەیشتن بە ڕێککەوتنێکی دادپەروەرانە و دەستبەرداربوون لە چەکی ئەتۆمی. ترەمپ نووسیویەتی: «پێشتر بە ئێرانم وت ڕێککەوتن بکەن، نەیانکرد و ئۆپەراسیۆنی چەکوشی نیوەشەو ڕوویدا کە وێرانکاریی گەورەی لێکەوتەوە». جەختیشی کردووەتەوە کە ئەگەر گوێڕایەڵ نەبن، هێرشی داهاتوو «زۆر خراپتر» دەبێت.
وەڵامی توند و ئامادەکارییەکانی ئێران
لەلایەکی دیکەوە، فاتمە موهاجیرانی، وتەبێژی حکومەتی ئێران ڕایگەیاند کە وڵاتەکەی سڵ لە هیچ بژاردەیەک ناکاتەوە و «هەموو بژاردەکان لەسەر مێزن». ناوبراو دووپاتی کردەوە کە لەگەڵ دۆخی ئاڵۆزی ناوچەکە، ئێران بەوپەڕی ئامادەییەوە ئامادەیە بۆ شەڕ و هەر پێشهاتێکی دیکە.
هاوکات عەباس عەراقچی، وەزیری دەرەوەی ئێران، ئەو دەنگۆیانەی ڕەتکردەوە کە باس لەوە دەکەن ئێران داوای دانوستانی لە ئەمریکا کردبێت. عەراقچی ڕایگەیاند: «هیچ پەیوەندییەک لەنێوان من و ستیڤ ویتکۆفی نێردەی تایبەتی ئەمریکا ئەنجام نەدراوە»، بەڵام ئاشکرای کرد کە هەندێک وڵات وەک نێوەندگیر لە پەیوەندیدان.
جموجۆڵی سەربازی لە ناوچەکە
بەپێی زانیارییەکان، هاوتەریب لەگەڵ جووڵەی کەشتییە فڕۆکەهەڵگرەکە، فەرماندەیی ناوەندیی ئەمریکا (سێنتکۆم) دەستی بە مانۆڕێکی گەورەی ئاسمانی کردووە لە ڕۆژهەڵاتی ناوەڕاست بۆ نیشاندانی هێز. وەزارەتی دەرەوەی ئەمریکاش لە پەیامێکدا جەختی کردووەتەوە کە «ترەمپ پیاوی کردارە» و بە وردی چاودێریی ئێران دەکەن.