ناکۆکی لەسەر دیاریکردنی کاندید
بەپێی زانیارییەکان، لە ماڵی خەمیس خەنجەر کۆبوونەوەی لایەنە سوننەکان بۆ یەکلاییکردنەوەی کاندیدی سەرۆکی پەرلەمان بەڕێوەچوو. سەرچاوەکان سەرەتا ئاشکرایان کرد کە (هەیبەت حەلبووسی) لە فراکسیۆنی تەقەدووم وەک کاندید دیاریکراوە، بەڵام میدیاکانی عێراق بڵاویان کردەوە کە کۆبوونەوەکە بەهۆی ناکۆکی توندەوە بەبێ ڕێککەوتنی کۆتایی کۆتایی هاتووە و بەشێک لە سەرکردەکان کۆبوونەوەکەیان جێهێشتووە. لە ئێستادا ئەگەری ئەوە هەیە سوننەکان بە دوو کاندید (هەیبەت حەلبووسی و موسەننا سامەڕایی) بچنە نێو دانیشتنەکەی پەرلەمانەوە.
دابەشکاری پۆستی جێگرەکان
سەبارەت بە پۆستی جێگرانی سەرۆکی پەرلەمان، زانیارییەکان ئاماژە بەوە دەکەن کە لایەنە شیعییەکان (عەدنان فەیحان)یان بۆ پۆستی جێگری یەکەم دیاریکردووە کە پێشتر پارێزگاری بابل بووە. بۆ پۆستی جێگری دووەمیش کە پشکی کوردە، تا ئێستا ناوی (شاخەوان عەبدوڵا) دەهێنرێت، هەرچەندە فراکسیۆنە کوردستانییەکان هێشتا بڕیاری کۆتاییان لەسەر شێوازی دەنگدان نەداوە و ڕایانگەیاندووە سبەی بڕیاری یەکلاکەرەوە دەدەن.
هۆشداری دەسەڵاتی دادوەری
لای خۆیەوە فایق زەیدان، سەرۆکی ئەنجومەنی باڵای دادوەری عێراق جەختی کردەوە کە دەبێت لە دانیشتنی یەکەمی پەرلەماندا (سبەی دووشەممە) سەرۆک و دوو جێگرەکەی هەڵبژێردرێن و هەر دواخستنێک بە پێشێلکاری دەستووری دادەنرێت. ئەمەش لە کاتێکدایە کە ململانێی توند لە نێوان بەرەی تەقەدووم و هاوپەیمانی عەزم و حەسم لەسەر پۆستەکە بەردەوامە و هێشتا کۆدەنگی تەواو دروست نەبووە.