کۆتاییهاتنی وادەی سزاکە
بڕیارە سبەی دووشەممە، ٢٩ی کانوونی یەکەمی ٢٠٢٥، ماوەی یاسایی زیندانیکردنی شاسوار عەبدولواحید، سەرۆکی جوڵانەوەی نەوەی نوێ کۆتایی پێبێت. ناوبراو لە ناوەڕاستی مانگی ئابی ئەمساڵدا دەستگیرکرا و دواتر سزای پێنج مانگ زیندانیکردنی بەسەردا سەپێنرا.
پشووەکان ڕێگرن لە ئازادکردنی؟
سەرەڕای تەواوبوونی وادەکەی، وتەبێژی دادگای سلێمانی ڕایگەیاندووە کە بەهۆی پشووە فەرمییەکانی کۆتایی ساڵەوە، ناتوانرێت ڕێکارەکانی ئازادکردن ئەنجام بدرێن تا دەستپێکردنەوەی دەوامی فەرمی. حاکم سەڵاح حەسەن ئاماژەی بەوە کردووە کە لە ڕۆژانی پشوودا مامەڵەی ئازادکردن ڕایی ناکرێت، بۆیە ئەگەری هەیە پرۆسەکە بۆ دوای پشووەکان دوا بکەوێت.
دۆسیەکانی دیکە
شاسوار عەبدولواحید لەسەر سکاڵای یاسایی و بە ماددەی ٤٣١ لە یاسای سزادانی عێراقی دەستگیرکرابوو. سەرچاوەکان ئاماژە بەوە دەکەن کە جگە لەم دۆسیەیە، چەند سکاڵایەکی دیکەش لەسەر ناوبراو تۆمار کراون و هێشتا ڕوون نییە ئایا دادگا بڕیاری ئازادکردنی دەدات یان بەهۆی دۆسیەکانی دیکەوە لە زیندان دەمێنێتەوە.