مەزڵوم عەبدی، فەرماندەی گشتیی هێزەکانی سوریای دیموکرات (هەسەدە)، بەبۆنەی هاتنی ساڵی نوێی زایینی ٢٠٢٦، پەیامێکی بڵاوکردەوە و تێیدا پیرۆزبایی ئاراستەی سەرجەم پێکهاتەکانی گەلی سوریا، شەڕڤانان و خانەوادەی شەهیدان کرد.
عەبدی لە پەیامەکەیدا کە لە تۆڕی کۆمەڵایەتی ئێکس بڵاویکردووەتەوە، دەڵێت: «لەگەڵ دەستپێکی ساڵی نوێدا، جەخت لەسەر نوێکردنەوەی بەڵێن و کارکردنی پێکەوەیی دەکەینەوە لەپێناو بنیاتنانی سوریایەکی گەشەسەندوو کە خێر و ئاشتی تێیدا باڵادەست بێت و هەموو رۆڵەکانی وڵات تێیدا لە سایەی ئاسایش و سەقامگیریدا بژین».
بەسەرکردنەوەی شەڕڤانان
هاوکات ناوەندی ڕاگەیاندنی هەسەدە بڵاویکردەوە کە بەبۆنەی سەری ساڵەوە، مەزڵوم عەبدی سەردانی یەکێک لە خاڵە سەربازییەکانی هێزەکانیانی کردووە و لە نزیکەوە پیرۆزبایی لە شەڕڤانان کردووە و ستایشی قوربانیدان و ڕۆڵیان لە پاراستنی ناوچەکەدا کردووە.
پەیامەکەی فەرماندەی هەسەدە جەخت لەسەر ئیرادەی هاوبەش و پێکەوەژیان دەکاتەوە وەک بنەمایەک بۆ داهاتووی سوریا، بەو هیوایەی ساڵی نوێ کۆتایی بە نەهامەتییەکان بهێنێت.