حکومەتی هەرێمی کوردستان بە فەرمی قەبارەی ئەو زیانانەی خەمڵاند کە بەهۆی تاوانەکانی ڕژێمەکانی پێشووی عێراق بەر خەڵکی کوردستان کەوتوون و داوای قەرەبووکردنەوەیەکی دارایی گەورە لە بەغدا دەکات.
فەرمانگەی میدیا و زانیاریی حکومەتی هەرێم لە ڕاپۆرتێکی ورددا ئاشکرای کرد، کۆی گشتیی ئەو زیانانەی لە نێوان ساڵانی ١٩٦٣ بۆ ٢٠٠٣ بەهۆی سیاسەتە چەوسێنەرەکان، ئەنفال، کیمیاباران و وێرانکردنی گوندەکان بەر کوردستان کەوتوون، دەگاتە ٣٨٤ ملیار و ٦٠٠ ملیۆن دۆلار. حکومەت جەخت دەکاتەوە کە ئەمە مافێکی دەستوورییە و حکومەتی فیدراڵ دەبێت پابەند بێت بە پێدانی.
بەپێی داتاکانی حکومەتی هەرێم، وردەکاریی زیانەکان بەم شێوەیە دابەش کراون:
زیانە مرۆییەکان: ٣٠٦ ملیار دۆلار (گەورەترین پشک).
پشتگوێخستن و ئاوەدانکردنەوە: ٣٥ ملیار دۆلار.
زیانە ماددییەکان (ژێرخان و ماڵ): ٣٢.٨ ملیار دۆلار.
زیانە ژینگەیی و ناڕاستەوخۆکان: ١٠ ملیار دۆلار.
حکومەتی هەرێم لەم داواکارییەدا پشت بە ماددەکانی ١١٢ و ١٣٢ی دەستووری هەمیشەیی عێراق دەبەستێت. بەپێی ڕاپۆرتەکە، حکومەتی ئێستای عێراق «میراتگری ڕژێمەکانی پێشووە» و بەرپرسیارێتیی یاسایی و دەستووریی لەسەرە بۆ قەرەبووکردنەوەی زیانلێکەوتووانی دەستی ڕژێمی بەعس و ڕژێمەکانی پێشوو.
ماددەی ١٣٢ی دەستوور بە ڕوونی ئاماژە بەوە دەکات کە دەوڵەت پابەندە بە قەرەبووکردنەوەی قوربانیانی ڕژێمی پێشوو، هەروەها ماددەی ١١٢ جەخت لە دابەشکردنی دادپەروەرانەی داهات دەکاتەوە بۆ ئەو ناوچانەی بەهۆی سیاسەتەکانی ڕابردووەوە بێبەش کراون.