دوای ئەوەی بەهۆی بارینی بەفرێکی زۆر و دروستبوونی ئاستەنگی هاتووچۆ لە دیوی باکووری کوردستان (تورکیا)، دەروازەی نێودەوڵەتیی ئیبراهیم خەلیل بە ڕووی گەشتیاران و بارهەڵگرەکاندا داخرابوو، ئێستا هاتووچۆ ئاسایی بووەتەوە.

کامی کەمال، گوتەبێژی کۆمەڵگەی دەروازەی نێودەوڵەتیی ئیبراهیم خەلیل ڕایگەیاند کە ڕاگرتنی هاتووچۆکە پەیوەندی بە دیوی هەرێمی کوردستانەوە نەبووە، بەڵکو بەهۆی خراپی کەشوهەوا و داخستنی ڕێگەکان بووە لە دیوی تورکیا. بە وتەی ناوبراو، دوای پاککردنەوەی ڕێگەکان لەلایەن تیمەکانی تورکیاوە، لایەنی تورکی بە فەرمی ئاگاداری کردوونەتەوە کە ڕێگاکان کراونەتەوە و هاتووچۆ دەتوانێت دەستپێبکاتەوە.

کاریگەری شەپۆلی بەفر

لە چەند ڕۆژی ڕابردوودا شەپۆلێکی بەفربارین ناوچە سنوورییەکانی نێوان هەرێمی کوردستان و تورکیای گرتووەتەوە، کە بووە هۆی ئەوەی بۆ ماوەیەکی کاتی هاتووچۆی بازرگانی و گەشتیاری پەک بکەوێت. دەروازەی ئیبراهیم خەلیل کە دەکەوێتە زاخۆ، یەکێکە لە گرنگترین دەروازە بازرگانییەکانی هەرێم و عێراق کە ڕۆژانە هەزاران بارهەڵگر و گەشتیار تێیدا تێپەڕ دەبن.