ئومێد خۆشناو، پارێزگاری هەولێر، لە کۆنفرانسێکی ڕۆژنامەوانیدا کە لە کۆتایی ساڵدا ئەنجامی دا، ئامارە فەرمییەکانی کەرتی گەشتوگوزاری بۆ ساڵی ٢٠٢٥ خستەڕوو. بەگوێرەی داتاکان، کەرتی گەشتیاری لە پایتەختی هەرێمی کوردستان گەشەی بەرچاوی بەخۆیەوە بینیوە و بووەتە جێگەی سەرنجی گەشتیارانی ناوخۆ و عێراق.
ژمارەی گەشتیاران و جووڵەی ڕۆژانە
بەپێی داتاکانی بەڕێوەبەرایەتیی گشتیی گەشتوگوزاری هەولێر، لە ١ی کانوونی دووەم تاوەکو ١ی کانوونی یەکەمی ٢٠٢٥، ژمارەی ئەو گەشتیارانەی سەردانی پارێزگای هەولێریان کردووە گەیشتووەتە سێ ملیۆن و ٤٠٠ هەزار کەس. پارێزگار ڕوونی کردەوە کە ئەم ژمارەیە ئامارەکانی مانگی کۆتایی ساڵی تێدا نییە، بۆیە ژمارەی کۆتایی ساڵ بە دڵنیاییەوە زیاتر دەبێت.
هەروەها ئاماژەی بەوە کرد کە جووڵەی هاتنەژوورەوە بۆ شارەکە بەردەوامە و ڕۆژانە بە تێکڕا ١٠٠ بۆ ١٢٠ هەزار کەس لە شارەکانی دیکەی هەرێمی کوردستان و پارێزگاکانی ناوەڕاست و خوارووی عێراقەوە ڕوو لە هەولێر دەکەن.
پڕۆژەکان و «ساڵی خۆڕاگری»
ئومێد خۆشناو ساڵی ٢٠٢٥ی بە «ساڵی خۆڕاگری»ی خەڵکی کوردستان وەسف کرد بەرامبەر قەیران و ئاڵنگارییەکان. ناوبراو جەختی کردەوە کە سەرەڕای دۆخەکە، حکومەتی هەرێم توانیویەتی دەیان پڕۆژەی ستراتیژیی خزمەتگوزاری جێبەجێ بکات و بەڵێنی دا لە ئایندەیەکی نزیکدا بەشێکی دیکە لەو پڕۆژانە بکەونە خزمەت هاووڵاتییانەوە.
ژێرخان و ئاسانکارییەکان
سەبارەت بە ژێرخانی گەشتیاری، ئومێد خۆشناو ڕایگەیاند لە سنووری پارێزگای هەولێر ١٦١١ شوێنی گەشتیاریی مۆڵەتپێدراو هەن، کە پێکهاتوون لە:
٤٤٥ هۆتێل و مۆتێل
٤٧ گوندی گەشتیاری
هەروەها باسی لەو ئاسانکارییانە کرد کە بۆ گرووپە گەشتیارییەکان کراوە؛ لەکاتێکدا پێشتر تەنیا لە ڕۆژدا ڕێگەیان پێ دەدرا بێنە ناو شار، ئێستا لە ٢٤ کاتژمێردا دەتوانن بەبێ گرفت سەردان بکەن، کە ئەمەش بەشێکە لە پلانی هاوبەشی نێوان دامودەزگاکانی حکومەت و دەزگا ئەمنییەکان.