باد بەنی لە کاتی پێشکەشکردنی وتاری سەرکەوتنەکەیدا لە ڕێوڕەسمی خەڵاتەکانی گرامی لە شەوی یەکشەممەدا، ڕەخنەی لە ئاژانسی جێبەجێکردنی یاساکانی کۆچبەری و گومرگ (ICE) گرت، ئەمەش تەنها هەفتەیەک پێش ئەوەی بریکارەکانی دۆناڵد ترەمپ لە کاتی بەڕێوەچوونی ئاهەنگی سوپەر بۆڵدا چاودێری ناوچەکە بکەن.

ئەو هونەرمەندە پۆرتۆریکۆییە شەوی یەکشەممە سێ خەڵاتی بەدەستهێنا، لەنێویاندا خەڵاتی بەنرخی ئەلبوومی ساڵ، ئەمەش لە سەرەتای هەفتەیەکدا کە دەبێتە هەفتەیەکی پڕ مشتومڕ بۆ ئەو هونەرمەندە تەمەن ٣١ ساڵە. بڕیارە لە ٨ی شوباتدا، وەک گۆرانیبێژی کاتی پشووی یارییەکە (Halftime) بچێتە سەر شانۆی یاریگای لیڤایس لە کاتی یاری سوپەر بۆڵ لە نێوان یانەکانی سیاتڵ سیهۆکس و نیو ئینگلاند پاتریۆتس.

ناکۆکییە سیاسییەکان و هەڵوێستی ئیدارەی ترەمپ

ڕاگەیاندنی بەشداریکردنی باد بەنی، کە ناوی ڕاستەقینەی «بێنیتۆ ئەنتۆنیۆ مارتینێز ئۆکاسیۆ»یە، لە کۆتایی مانگی ئەیلولدا دەستبەجێ ئەم گۆرانیبێژەی خستە ناو زریانێکی سیاسییەوە. لە ماوەی چەند ڕۆژێکدا، ئەم هەڵبژاردنە ڕووبەڕووی ڕەخنەی توندی بەرپرسانی باڵای حکومەت بووەوە کە پرسیاریان لەسەر ڕەخنەکانی ڕابردووی هونەرمەندەکە سەبارەت بە سیاسەتەکانی کۆچبەریی ئەمریکا هەبوو. ناوبراو پێشتر ئاماژەی بەوە کردبوو کە بریکارەکانی ICE هۆکار بوون بۆ ئەوەی هیچ بەروارێکی گەشتەکانی لە ناوخۆی ئەمریکا دیاری نەکات. دۆناڵد ترەمپ یەکێک بوو لەوانەی ڕەخنەی لە بڕیارەکە گرت و دواتر ئاشکرای کرد کە بەهۆی هەڵبژاردنی ئەو پۆرتۆریکۆییەوە ئامادەی یارییەکە نابێت.

لەگەڵ بەرزبوونەوەی گرژییەکان لە سەرانسەری ئەمریکا، باد بەنی لە کاتی وەرگرتنی یەکێک لە خەڵاتەکاندا نەیتوانی خۆی بگرێت و ڕەخنەی لە پۆلیسی کۆچبەری گرت و وتی: «پێش ئەوەی سوپاسگوزاری خودا بم، دەڵێم: ICE بڕۆنە دەرەوە». پێش ئەوەی بەردەوام بێت لە قسەکانی، چەپڵەڕێزانێکی گەورەی لەلایەن ئامادەبووانەوە بۆ کرا و وتی: «ئێمە دڕندە نین. ئێمە ئاژەڵ نین. ئێمە بێگانە نین. ئێمە مرۆڤین و ئێمە ئەمریکین».

نیگەرانییە ئەمنییەکان و کوشتنی هاوڵاتیان

ئیدارەی ترەمپ پێشبینی دەکرێت بریکارەکانی ICE ڕەوانەی ناوچەی بەی ئێریا بکات پێش یارییەکە. کریستی نۆم، وەزیری ئاسایشی ناوخۆ پێشتر بەڵێنی دابوو کە «لە هەموو شوێنێک دەبین»، لە کاتێکدا بەرپرسێکی ئاسایشی ناوخۆ لەم هەفتەیەدا هۆشداریدا: «ئەوانەی بە یاسایی لێرەن و یاساکانی دیکە پێشێل ناکەن، هیچ ترسێکیان نییە».

یاری سوپەر بۆڵ لە یاریگای لیڤایس لە سانتا کلارا لە کاتێکدا بەڕێوەدەچێت کە گرژییەکان لە ئەمریکا زیادیان کردووە دوای کوشتنی ئەلێکس پرێتی لە مینیاپۆلیس، کە دوای دوو هەفتە هات لە کوشتنی ڕێنێ گود تەمەن ٣٧ ساڵ لە ناو ئۆتۆمبێلەکەیدا لەلایەن ئەفسەرێکی ICEـەوە. گیانلەدەستدانی ئەوان ناڕەزایەتی بەرفراوانی لێکەوتەوە و هەندێک لە ئیدارەی ترەمپ بەرپرسانی ناوخۆییان تۆمەتبار کرد بەوەی پاڵپشتی پێویستی هێزە فیدراڵییەکان ناکەن.

باب جۆنسن، شەریفی ناوچەی سانتا کلارا لە کۆنگرەیەکی ڕۆژنامەوانیدا ڕایگەیاند کە هێزەکانیان هاوکاری پۆلیسی کۆچبەری ناکەن و وتی: «ئێمە کار ناکەین و پاڵپشتی جێبەجێکردنی یاساکانی کۆچبەری (ICE) ناکەین». جەختیشی کردەوە کە ئەگەر هێزە ئەمنییەکان ببینرێن، ئەوا بۆ پاراستنی هاوڵاتیانە.