دۆخی ڤەنزوێلا پێ دەنێتە قۆناغێکی مەترسیدارەوە دوای ئەوەی هێزەکانی ئەمریکا لە ئۆپەراسیۆنێکی سەربازیدا لە کاراکاسی پایتەخت، «نیکۆلاس مادورۆ» سەرۆکی ئەو وڵاتەیان دەستگیرکرد، ئەمەش کاردانەوەی توندی لێکەوتەوە.
ئاماری قوربانیان و چارەنووسی مادورۆ
بەگوێرەی زانیارییەکان، ئۆپەراسیۆنەکەی ئەمریکا تەنها بە دەستگیرکردنی مادورۆ کۆتایی نەهاتووە، بەڵکو بووەتە هۆی کوژرانی نزیکەی ٤٠ کەس لە هاوڵاتیانی مەدەنی و سەربازی. دۆناڵد ترەمپ، سەرۆکی ئەمریکا هێرشەکەی بە «سەرکەوتوو» وەسفکردووە و ڕایگەیاندووە کە مادورۆ دەگوازرێتەوە بۆ نیویۆرک بۆ ئەوەی ڕووبەڕووی دادگا بکرێتەوە.
گۆڕانکاری لە دەسەڵات
لە پەرەسەندنێکی خێرادا، ژووری دەستووریی دادگای باڵای ڤەنزوێلا کۆبووەوە و بڕیاریدا «دێڵسی رۆدریگێز»، جێگری سەرۆک، وەک سەرۆکی ڕاسپێردراو دیاری بکات. دادگاکە ڕووداوەکەی بە «ڕفاندن» ناساندووە و بە پشتبەستن بە ماددەکانی دەستوور، دەسەڵاتەکانی سەرۆکی بەخشییە رۆدریگێز بۆ پڕکردنەوەی بۆشایی دەستووری و پاراستنی سەروەریی وڵات.
هەڵوێستی حیزبی شیوعی کوردستان
لە ئاستی ناوخۆدا، حیزبی شیوعی کوردستان وەک یەکەم لایەن بەیاننامەیەکی توندی بڵاوکردەوە و تیایدا سەرکۆنەی هێرشەکەی کرد. مەکتەبی سیاسیی حیزبەکە ڕایگەیاند: «بە توندی سەرکۆنەی دەستدرێژییەکانی ئەمریکا بۆ سەر ڤەنزوێلا دەکەین و ئەمە کردەوەیەکی دوژمنکاریی سەربازییە دژی دەوڵەتێکی سەربەخۆ و ئەندامی نەتەوە یەکگرتووەکان».
ململانێی وزە و ئابووری
حیزبی شیوعی لە شیکردنەوەی هۆکارەکانی پشت ئەم هێرشەدا ئاماژەی بەوە داوە کە ئەمریکا توانای کێبڕکێی ئابووری لەدەستداوە و دەیەوێت لە ڕێگەی دەستگرتن بەسەر سەرچاوەکانی نەوت و وزەدا هاوسەنگییەکان ڕاست بکاتەوە. لە بەیاننامەکەدا هاتووە: «دۆناڵد ترەمپ بە ڕوونی سەلماندی کە هەوڵدەدات بۆ بەردەوامیدان بە ڕێبازی مێژوویی ئەمریکا لە سەپاندنی هەژموونی جیهانی».
حیزبەکە هۆشداریشی داوە کە ئەم سیناریۆیە تەنها لە ڤەنزوێلا ناوەستێت و پێشبینی دەکات لەمساڵ و ساڵانی داهاتوودا لە وڵاتانی دیکەی ئەمەریکای لاتین دووبارە ببێتەوە.