دادگای سلێمانی بڕیاریدا ماوەی ڕاگرتنی شاسوار عەبدولواحید، سەرۆکی جوڵانەوەی نەوەی نوێ تا ڕۆژی ١٢ی کانوونی دووەمی ٢٠٢٦ درێژ بکاتەوە، ئەمەش سەرەڕای ئەوەی بەپێی وتەی پارێزەران و سەرچاوەکانی جوڵانەوەکە، ناوبراو ماوەی سزاکەی پێشووی تەواو کردووە.
بەپێی زانیارییەکان، ئەمڕۆ یەکشەممە ٤ی کانوونی دووەم، هەفتەیەک تێپەڕیوە بەسەر تەواوبوونی ئەو سزایەی کە پێشتر بەسەریدا سەپێندرابوو، بەڵام بەهۆی تۆمارکردنی چەند سکاڵایەکی نوێ لە دژی ناوبراو، دادگا بڕیاری ئازادکردنی دەرنەکرد و دۆخی ناوبراو لە «حوکمدراو»ـەوە گۆڕاوە بۆ «ڕاگیراو» بەپێی دۆسیە نوێیەکان.
وردەکاریی هەژمارکردنی سزاکە
سەرچاوەیەکی باڵا لە جوڵانەوەی نەوەی نوێ ئاشکرای کردووە کە سزای پێنج مانگ زیندانییەکە لە ٢ی ئەیلوولی ٢٠٢٥ دەرچووە، بەڵام بەپێی بڕیارەکە دەبوایە ماوەی ڕاگرتنەکانی پێشوو هەژمار بکرایە. بەگوێرەی سەرچاوەکە: «١٤ ڕۆژ لە ساڵی ٢٠١٩ و ٢١ ڕۆژ لە مانگی ئابی ٢٠٢٥ پێش دەرچوونی حوکمەکە ڕاگیراوە، بەمەش دەبوایە لە ٢٩ی کانوونی یەکەمی ٢٠٢٥ ئازاد بکرایە».
هۆکاری درێژکردنەوەی ماوەکە
حاکم سەڵاح، وتەبێژی دادگای سلێمانی لە لێدوانێکدا هۆکارەکەی ڕوونکردووەتەوە و ڕایگەیاندووە: «داواکارییەکان لەسەر شاسوار عەبدولواحید بڵاون؛ لە دادگای لێکۆڵینەوەی سلێمانی (کەرتەکانی ٣ و ٨) و چەند دادگایەکی دیکەش سکاڵای لەسەر تۆمار کراوە». بەپێی سەرچاوەکان بەشێک لەم سکاڵایانە پەیوەندییان بە دۆسیەی «خاوەن پشکەکان» و سکاڵای هاوڵاتیانەوە هەیە.
پاشخانی دۆسیەکە
شاسوار عەبدولواحید لە شەوی ١٢ی ئابی ٢٠٢٥ دەستگیرکرا و دواتر بەپێی ماددەی ٤٣١ لە یاسای سزادانی عێراقی و لەسەر سکاڵای پەرلەمانتار شادی نەوزاد، سزای پێنج مانگ زیندانیکردنی بەسەردا سەپێندرا. لای خۆیەوە بورهان ڕەشید، پارێزەری سەرۆکی جوڵانەوەی نەوەی نوێ سەبارەت بە بڕیارە نوێیەکە ئاماژەی بەوە کردووە کە تا ئێستا «هیچ زانیارییەکی نییە»، هاوکات میدیای فەرمی نەوەی نوێ دۆسیەکە بە «سیاسی» ناو دەبات.