ئەمڕۆ شەممە، ٣ی کانوونی دووەمی ٢٠٢٦، هاوکات لەگەڵ هاتنەوەی جەژنی سێ شەوەی یاران (قەوڵتاس)، سەرۆکایەتییەکانی هەرێم و حکومەت و سەرکردەی لایەنە سیاسییەکان پەیامی پیرۆزباییان ئاڕاستەی کاکەییەکانی کوردستان و جیهان کرد و جەختیان لەسەر پێکەوەژیان و پاراستنی مافەکانیان کردەوە.
نێچیرڤان بارزانی، سەرۆکی هەرێمی کوردستان لە پەیامەکەیدا کاکەییەکانی بە «پێکهاتەیەکی رەسەن و دێرینی ئەم نیشتمانە» وەسف کرد و ڕایگەیاند: «هەمیشە نموونەی جوانی لێبووردەیی، ئاشتیخوازی و نیشتمانپەروەری بوون و بە درێژایی مێژوو پارێزگارییان لە ناسنامە و ئایین و کولتووری خۆیان کردووە». سەرۆکی هەرێم دووپاتیشی کردەوە کە بەردەوام دەبن لە پشتیوانیکردنی مافەکانیان و پاراستنی تایبەتمەندیی ئایینی و کۆمەڵایەتییان.
لای خۆیەوە مەسعود بارزانی، سەرۆکی پارتی دیموکراتی کوردستان وێڕای پیرۆزبایی، هیوای خواست هەموو پێکهاتە ئایینی و نەتەوەییەکانی کوردستان جەژن و خۆشییەکانیان لە سایەی ئاسوودەییدا بکەنەوە و ڕایگەیاند: «کوردستان وڵاتی تەبایی، برایەتی و پێکەوەژیانە».
هاوکات مەسرور بارزانی، سەرۆکی حکومەتی هەرێمی کوردستان لە پەیامەکەیدا ئاماژەی بە ڕۆڵی مێژوویی کاکەییەکان دا و گوتی: «کاکەییەکان بەشێکی گرنگی گەلی کوردستانن و خاوەنی خەبات و تێکۆشان و مێژوویەکی پڕ لە سەروەرین لە بزووتنەوەی ڕزگاریخوازی گەلی کوردستاندا». ناوبراو هیواشی خواست کە هەموو پێکهاتەکان هەمیشە بە تەبایی و لە ئاشتیدا بژین.
هەر لەم چوارچێوەیەدا، بافڵ جەلال تاڵەبانی، سەرۆکی یەکێتیی نیشتمانیی کوردستان لە پەیامێکدا پشتیوانی حیزبەکەی بۆ کاکەییەکان دووپاتکردەوە و ڕایگەیاند: «یەکێتیی نیشتمانیی کوردستان بە ئەرکى خۆى دەزانێت کە بەردەوام پارێزەرى مافەکانتان بێت لە هەرێمى کوردستان و عێراق»، هەروەها ئاماژەی بەوە دا کە کاکەییەکان بەشێکى سەرەکین لە کۆمەڵانى خەڵکى کوردستان.