بەڕێوەبەرایەتیی گشتیی بەنداو و کۆگاکانی ئاو لە هەرێمی کوردستان ئاشکرای کرد کە شەپۆلی بارانبارینی ئەم دواییە کاریگەری ئەرێنی لەسەر سەرچاوەکانی ئاو هەبووە و ئاستی ئاوی بەنداوەکان بەشێوەیەکی بەرچاو بەرزبووەتەوە. بەپێی ڕاگەیەندراوی ئەمڕۆ دووشەممە ٢٩ی کانوونی یەکەمی ٢٠٢٥ی وەزارەتی کشتوکاڵ، پێشبینی دەکرێت کاریگەریی شەپۆلەکە بۆ ڕۆژانی داهاتووش بەردەوام بێت و بەهۆیەوە بە بوژاندنەوەی سەرچاوەکانی ئاوەوە هەرێم دەچێتە ناو ساڵی نوێوە.
ئاماری زیادبوونی ئاو
بەگوێرەی ئامارەکانی بەڕێوەبەرایەتییەکە، تەنها لە ماوەی ٢٤ کاتژمێری ڕابردوودا لە هەردوو بەنداوی دوکان و دەربەندیخان زیاتر لە ١٠٠ ملیۆن مەتر سێجا ئاو کۆگاکراوە. لەسەر ئاستی بەرزبوونەوەش، ئاستی ئاوی بەنداوی دوکان ٨٥ سانتیمەتر و بەنداوی دەربەندیخان ٦٠ سانتیمەتر بەرزبووەتەوە. هەروەها لە بەنداوی گۆمەسپان ئاستی ئاو ٦٠ سانتیمەتر و لە بەنداوی دهۆکیش ١٦ سانتیمەتر زیادی کردووە. هاوکات فەرمانگەی کەشناسیی کشتوکاڵی سلێمانی ئاشکرای کردووە کە ڕێژەی بارانبارین بەراورد بە ساڵی ڕابردوو زۆر زیادی کردووە؛ بەجۆرێک لە سلێمانی ئەمساڵ ٣٦١.٢ ملم باران باریوە لەکاتێکدا پارساڵ تا ئەم کاتە تەنها ١٨٣ ملم بووە، هەروەها لە هەڵەبجە ئەمساڵ ٢٨٤ ملم تۆمار کراوە بەراورد بە ٢٤٢ ملمی ساڵی ڕابردوو.
سەرڕێژبوونی بەنداوی دێوانە
بەهۆی زۆری بارانبارینەوە، کاتژمێر ١٢ی شەوی ڕابردوو بەنداوی دێوانە لە سنووری دەربەندیخان سەرڕێژی کرد. بەپێی زانیارییەکان، ئەم بەنداوە دەکەوێتە باشووری شارۆچکەی دەربەندیخان، بەرزاییەکەی ٤٢ مەتر و پانییەکەی ٢٦٠ مەترە، تێچووی دروستکردنی ٢٤ ملیار دینار بووە و توانای گلدانەوەی ٢١ ملیۆن مەتر سێجا ئاوی هەیە. لەوبارەیەوە سلێمان محەمەد سەعید، قایمقامی قەزای دەربەندیخان هۆشداری بەپەلەی ئاراستەی هاوڵاتییان و خاوەن پڕۆژە و ئاژەڵدارانی خوارووی بەنداوەکە کردووە کە لێی دووربکەونەوە و بەهیچ شێوەیەک سەردانی ئەو ناوچەیە نەکەن. هەروەها داوا لە شۆفێران کراوە بەهۆی نالەباری کەشوهەواوە بە وریاييەوە مامەڵە لەگەڵ ڕێگاوبانەکان بکەن و ئەگەر بۆ کاری زۆر پێویست نەبێت، ڕێگا سەرەکییەکان بەکارنەهێنن.
مەترسی لە بەنداوی خنس
لەلایەکی دیکەوە فەرهاد محەمەد تاهیر، بەڕێوەبەری بەنداوی دهۆک هۆشداری دایە دانیشتووانی سنووری قەزای شێخان و ڕایگەیاند، بەهۆی بەرزبوونەوەی ئاستی ئاوەکەیەوە، بەنداوی خنس نزیکبووەتەوە لە سەرڕێژبوون. ناوبراو داوای لەو هاوڵاتییانە کرد کە ماڵ و گوندەکانیان دەکەوێتە خوارووی ڕووباری بەنداوەکە، خۆیان بەدوور بگرن بۆ پاراستنی سەلامەتییان.
دۆخی بەنداوە بچووکەکان
سەبارەت بە بەنداوە بچووکەکانی سنووری پارێزگاکانی سلێمانی، هەولێر و دهۆک و ئیدارەی گەرمیان، بەڕێوەبەرایەتیی گشتیی بەنداوەکان ڕوونیکردووەتەوە کە زۆربەیان پڕبوون لە ئاو و سەرجەمیان بە سەلامەتی شەپۆلی لافاوەکەیان تێپەڕاندووە.