موستەفا قەرەسوو، ئەندامی کۆنسەی بەڕێوەبەریی کۆما جڤاکێن کوردستان (کەجەکە) لە میانی لێدوانێکدا بۆ ئاژانسی هەواڵی فورات، تیشکی خستە سەر دواین پێشهاتەکانی پرۆسەی ئاشتی و دۆخی عەبدوڵڵا ئۆجەلان، ڕێبەری زیندانیکراوی پەکەکە.

قەرەسوو جەختی کردەوە کە مەرجی سەرەکی بۆ سەرکەوتنی هەر پڕۆسەیەکی ئاشتی و گەیشتن بە کۆمەڵگەیەکی دیموکراتیک، بەستراوەتەوە بە گۆڕینی دۆخی ئۆجەلانەوە و وتی: «دەبێت ڕێبەر ئاپۆ دەستبەجێ دەستی بگاتە هەلومەرجی کار و ژیانی ئازاد». ئاماژەی بەوەشکرد کە ئەگەر بڕیارە پرسی کورد چارەسەر بکرێت، دەبێت بابەتی «مافی هیوا» کە دەوڵەت باخچەلی بەڵێنی داوە، بخرێتە بەرنامەی کارەوە.

سەبارەت بە دەنگۆی باشتربوونی دۆخی زیندانی ئیمراڵی، بەرپرسەکەی کەجەکە ئەو دەنگۆیانەی ڕەتکردەوە و ڕایگەیاند: «لە ئێستادا هیچ باشتربوونێک لە هەلومەرجی ئازادیی جەستەیی ڕێبەر ئاپۆدا نییە. تەنها هەندێک زانیاری هەیە کە هەوڵێک هەیە بۆ ئەوەی ئەو شوێنەی کە تێیدا دەمێنێتەوە گونجاوتر بێت».

لە بەشێکی دیکەی قسەکانیدا، قەرەسوو باسی لە ڕەهەندە یاساییەکانی ئازادکردنەکە کرد و ئاماژەی بەوەدا کە پرسی ئازادیی جەستەیی ئۆجەلان لە ڕووی تەکنیکییەوە بەبێ دەرکردنی یاساش دەکرێت چارەسەر بکرێت، بەڵام بۆ چارەسەرێکی ڕیشەیی پێویستە یاسا دەربچێت. ئەو وتی: «دەبێت یاسایەک دەربچێت کە ڕێبەر ئاپۆ و بەڕێوەبەریی پەکەکە و گەریلاش بگرێتەوە».

قەرەسوو لە کۆتاییدا پەیوەندی نێوان کورد و تورکی بە ستراتیژی و مێژوویی وەسف کرد و ڕوونیکردەوە کە کاتێک ئۆجەلان داوای چارەسەری دەکات، هەوڵدەدات بیبەستێتەوە بەم پەیوەندییە مێژووییەوە، چونکە بەبێ چارەسەرکردنی پرسی کورد، گۆڕەپانی سیاسی تورکیا تووشی «ئیفلیجی» دەبێت.