بەهۆی تەواونەبوونی ڕێژەی یاسایی و ڕێکنەکەوتنی لایەنە سیاسییەکان، دانیشتنی ئەنجوومەنی نوێنەرانی عێراق بۆ جاری دووەم لەم هەفتەیەدا شکستیهێنا و بۆ ڕۆژانی پێنجشەممە یان شەممەی داهاتوو دواخرا. بەپێی زانیارییەکان، سەرۆکایەتیی پەرلەمان «دوایین مۆڵەت»ی داوەتە لایەنەکان بۆ ڕێککەوتن، لەکاتێکدا هەندێک لە پەرلەمانتاران هۆشداریی کۆکردنەوەی واژۆ بۆ هەڵوەشاندنەوەی ئەم خولەی پەرلەمان دەدەن ئەگەر دۆخەکە بەم شێوەیە بەردەوام بێت.

سەردانی شاندی باڵا و دەستپێشخەرییە نوێیەکەی پارتی

بڕیارە سبەی دووشەممە، شاندێکی باڵای چوارچێوەی هەماهەنگی کە لە محەممەد شیاع سوودانی، هادی عامری و موحسین مەندەلاوی پێکهاتووە، بگەنە هەرێمی کوردستان. شاندەکە بەجیا لەگەڵ مەسعود بارزانی لە هەولێر و بافڵ جەلال تاڵەبانی لە سلێمانی کۆدەبنەوە. ئامانجی سەرەکیی سەردانەکە نزیککردنەوەی دیدگای پارتی و یەکێتییە لەسەر پۆستی سەرۆککۆمار، کە وەک کلیلێک بۆ تێپەڕاندنی بنبەستی سیاسیی عێراق سەیر دەکرێت.

لەم چوارچێوەیەدا، فوئاد حوسێن، وەزیری دەرەوەی عێراق و کاندیدی پارتی بۆ سەرۆککۆمار، ئاشکرای کرد کە بە فەرمی پێشنیازێکی نوێیان خستووەتە بەردەم یەکێتی. فوئاد حوسێن ڕایگەیاند: «پارتی ئامادەیە پۆستەکانی جێگری سەرۆکوەزیران، وەزیری دەرەوە، وەزیری ئاوەدانکردنەوە و نیشتەجێکردن، لەگەڵ پۆستی جێگری دووەمی سەرۆکی پەرلەمان پێشکەشی یەکێتی بکات، لەبەرامبەردا پارتی پۆستی سەرۆککۆمار و وەزارەتەکانی پشکی یەکێتی وەربگرێت».

گرێکوێرەی سەرۆکوەزیران و ڤیتۆی ئەمریکا

شاخەوان عەبدوڵا، سەرۆکی فراکسیۆنی پارتی جەختی کردەوە کە هۆکاری دواخستنی دانیشتنەکان تەنیا پەیوەست نییە بە کوردەوە، بەڵکو پەیوەندی بە ناکۆکییەکانی «ماڵی شیعە»شەوە هەیە لەسەر پۆستی سەرۆکوەزیران. ناوبراو ئاماژەی بەوە کرد کە چوارچێوەی هەماهەنگی سوورە لەسەر کاندیدکردنی نووری مالیکی، سەرەڕای ئاگاداربوونیان لە هەڵوێستی توندی کۆمەڵگەی نێودەوڵەتی.

سەبارەت بەم پرسە، فوئاد حوسێن دانی بەوەدا نا کە هەڕەشەکانی دۆناڵد تره‌مپ و سێناتۆرەکانی ئەمریکا بۆ بڕینی هاوکارییەکان لە ئەگەری دەستبەکاربوونی مالیکی «زۆر جددیین». ئەو وتی: «پێویستە شاندێک بچێتە واشنتن بۆ ئەوەی بەوردی تاوتوێی ئەم بابەتە بکەن، ئایا ڤیتۆکە لەسەر خودی کەسایەتیی مالیکییە یان بەرامبەر بەو ئاراستە سیاسییەیە کە نوێنەرایەتی دەکات؟». بەپێی زانیارییەکان، تۆم بەڕاک وەک نوێنەری تایبەتی تره‌مپ بۆ دۆسیەی عێراق دەستنیشان کراوە و ڕۆڵی لەم گۆڕانکارییانەدا دەبێت.

سووربوونی یەکێتی لەسەر کاندیدەکەی

سەرەڕای پێشنیازەکان، یەکێتیی نیشتمانیی کوردستان تا ئێستا هەڵوێستی نەگۆڕە. دیلان غەفور، وتەبێژی فراکسیۆنی یەکێتی ڕایگەیاند کە نزار ئامێدی تاکە کاندیدی ئەوانە و «بە هیچ جۆرێک لەگەڵ پارتی کاندیدی هاوبەشمان نابێت». لای خۆشیەوە سروە محەممەد، پەرلەمانتاری یەکێتی ڕایگەیاند، ئەگەر پارتی دەیەوێت کێشەکانی ناوخۆی هەرێم چارەسەر بکرێن، دەبێت لە بەغداد نەرمی بنوێنێت و پۆستی سەرۆککۆمار بۆ یەکێتی بێت.