ئەمڕۆ دووشەممە، خولی شەشەمی پەرلەمانی عێراق یەکەم دانیشتنی خۆی بە سەرۆکایەتیی عامر فایز وەک بەتەمەنترین پەرلەمانتار ئەنجام دا و تێیدا پەرلەمانتاران سوێندی یاساییان خوارد. دوای ململانێیەکی توند و ناکۆکییە ناوخۆییەکانی ماڵی سوننە، دواجار هەیبەت حەلبووسی بە زۆرینەی دەنگ وەک سەرۆکی خولی شەشەمی پەرلەمانی عێراق هەڵبژێردرا. هاوکات پرۆسەی هەڵبژاردنی جێگرانی سەرۆک بەڕێوەچوو و تێیدا جێگری یەکەم یەکلاکرایەوە، بەڵام هەڵبژاردنی جێگری دووەم بەهۆی یەکلانەبوونەوەی دەنگەکان چووە گەڕی دووەمەوە.
یەکلاکردنەوەی سەرۆک و جێگری یەکەم
سەرەڕای ئەوەی سەرەتا لایەنە سوننەکان دابەشبوون بەسەر دوو بەرەدا و هاوپەیمانیی عەزم کاندیدکردنی (هەیبەت حەلبووسی)ی بە “کودەتا” وەسف دەکرد، بەڵام لە دانیشتنەکەدا موسەنا سامەڕایی، کاندیدی هاوپەیمانیی عەزم، بەر لە دەنگدان لە پێناو “خزمەتکردنی گەل و یەکڕیزی” لە کاندیدبوون کشایەوە. بەمەش هەیبەت حەلبووسی، کاندیدی هاوپەیمانییەکانی تەقەدوم، سیادە، حەسم و جەماهیر وەتەنی، توانی بە بەدەستهێنانی ٢٠٨ دەنگ پۆستەکە مسۆگەر بکات. لە بەرامبەردا سالم عیساوی ٦٦ دەنگ و عامر عەبدولجەبار تەنها ٩ دەنگیان بەدەستهێنا. سەبارەت بە پۆستی جێگری یەکەم، عەدنان فەیحان لە فراکسیۆنی سادیقون بە ١٧٧ دەنگ هەڵبژێردرا، لەکاتێکدا رکابەرەکەی موحسین مەندەلاوی ١٠٧ دەنگی بەدەستهێنا.
ململانێی کورد لەسەر جێگری دووەم
سەبارەت بە پۆستی جێگری دووەمی سەرۆکی پەرلەمان کە پشکی کوردە، کێبڕکێیەکی بەهێز و چاوەڕواننەکراو لەنێوان د. شاخەوان عەبدوڵا (پارتی) و د. ڕێبوار کەریم (ڕەوتی هەڵوێست) دروست بوو. لە گەڕی یەکەمدا هیچ کام لە کاندیدەکان نەیانتوانی دەنگی پێویست (١٦٦ دەنگ) بەدەستبهێنن، بەمەش پرۆسەکە چووە گەڕی دووەم. بەپێی ئەنجامەکان، د. ڕێبوار کەریم ١٥٣ دەنگی بەدەستهێنا و د. شاخەوان عەبدوڵا ١١٩ دەنگی هێنا. لەم پرۆسەیەدا فراکسیۆنی نەوەی نوێ بایکۆتی دەنگدانی کرد، هەروەها شێروان دوبەردانی پەرلەمانتاری پارتی ئاماژەی بە بوونی “ناپاکی سیاسی و لۆبی” کرد دژی کاندیدەکەیان و زانیارییەکان ئاماژە بەوە دەکەن یەکێتی دەنگی بە کاندیدی پارتی نەداوە.
هەڵوێست و کاردانەوەکان
دوای دانیشتنەکە، بافڵ جەلال تاڵەبانی، سەرۆکی یەکێتیی نیشتمانیی کوردستان پیرۆزبایی لە هەیبەت حەلبووسی و عەدنان فەیحان کرد و هیواخواز بوو سەرۆکایەتیی نوێ وەک یەک تیم کار بکەن بۆ چارەسەرکردنی کێشەکانی نێوان هەرێم و بەغدا لەسەر بنەمای دەستوور. هاوکات هۆشیار زێباری، ئەندامی مەکتەبی سیاسی پارتی، وێڕای پیرۆزبایی ئاماژەی بەوە دا کە لەپاڵ کێبڕکێی ئاشکرادا، “ڕێککەوتنی سیاسیی پشت پەردەش” هەبووە.